http://www.LivingInthePhilippines.comis theORIGINAL, firstPhilippines Expat site on the Net, since 1989. This is not one of many knock-offs, copycats, imitations. Some have permutations of the names,misspellings and "in" and "the" or "ing." left off to deceive you. This is the original, by: Don A. Herrington
Gusto Kong
Mag-asawa ng Aklat
I Want To Marry a Book
Gusto Kong
Mag-asawa ng Aklat
I Want To Marry a Book
"Ok Class, Turn your books to
page…."
Eto na naman si Ma'am. Para sa karamihan ng
estudyanteng tulad
ko, madalas na naka-ka-irita ang
mga ganitong paulit-ulit na pahayag gaya ng isang
sirang plaka. Marahil, para sa mga henyo at "nerd",
isang karangalan ang sundin ang gintong utos na ito
at buklatin nang paisa-isa at dahan-dahan ang bawat
maninipis na pahina ng libro, lalo na kung mahihilig
silang magbasa. Sila’y yung mga tipo ng taong halos
asawahin na ang mga aklat at librong sa araw-araw ay
kaulayaw.
Ngunit para sa mga tipo ng estudyanteng talagang
walang kahilig-hilig magbasa, lalo lamang
madaragdagan ang sakit ng ulo at hapdi sa tiyan
dahil wala naman hinihintay kung hindi ang recess at
uwian. Kapag sinabi lamang ng guro na "Ok class,
open your books to page…" lalo lang sisidhi ang
kanilang pag-aaklas na kulang na lang ay magdala ng
plakards at sakupin ang buong silid sa pagsigaw ng,
"Ayokong mag-asawa ng aklat!!!"
Sa akin, ayoko ring mag-asawa ng aklat.
Sa halos araw-araw na ginawa ng Diyos, hindi ko
talaga maiwasang maka-enkwentro ng mga taong sobra
ang pagkahumaling sa pagbabasa. Hayan at makikita
mong nakaupo sa isang sulok, naaarmasan ng mga
nagkakapalang salamin sa taas ng grado, at halos
kainin na ang mukha ng taghiyawat sa sobrang dami.
At natural, hindi maaaring mawala ang mga makapal na
libro na hindi lamang nagsisilbing babasahin kundi
pananggalang din sa init ng araw, patak ng ulan at
pang-hampas sa nang-aasar na kaibigan.
Sa mga pagkakataong ganito, parang napakasarap
magtanong ng "Bakit gustong-gusto mong magbasa?"
Anong mayroon ang aklat na wala sa play station, PC
o Chessboard? Paanong hindi ka mapapatanong, e kung
gaano karami ang nakikita mong nagbabasa ng aklat ay
doble naman ang dami ng mga estudyanteng ni ang
humawak ng mga workbook at textbook ay
pinandidirihan. Lalong ayaw na mag-lakas loob na
harapin ang masungit na librarian at hiramin ang mga
kampon nitong aklat na halos naagnas at nangangamoy
lupa na sa tagal ng di pagkabuklat na animo'y nag-aalok
ng bulok na kaalaman.
Ayaw talaga nilang mag-asawa ng aklat.
Ngunit talagang ganito ang katotohanan. Ito ang
realidad. Wala kang magagawa kundi hanapin ang mga
sagot sa mga tanong mo.
Ayon sa mga eksperto, mababa ang antas sa ating
bansa kung patungkol sa pagbabasa. Sa mga pag-aaral,
lumalabas na mayorya sa mga pinoy ang walang
kahilig-hilig sa pagbabasa. Nangungunang sanhi ay
ang katamaran. Sa panig ng mga manggagawa, oras
naman ang kalaban. Ang mga ito ang mga pangunahing
salarin kung bakit malaking bahagdan ng mga
mamamayan ang hindi masyadong "updated" pagdating sa
mga current events at general information.
Pero kapag mga mismong ang mga eksperto at dalubhasa
ang kukwestiyunin kung gaano kahalaga ang pagbabasa,
halos mapapaangat ka sa iyong kinauupuan sa tindi ng
kanilang mga tugon. Kung itatanong kung paano nila
narating ang rurok ng kanilang tagumpay, hindi
mawawala ang mga pagpapasalamat sa mga aklat.
Maliban sa mga magagaling na guro at malulusog na
kaalamang kanilang itinuturo, ang pagbabasa ay may
napakalaking bahagi sa kanilang pagtatagumpay.
Katulad na lamang ni Ka Ernie Baron, na tinaguriang
"The Walking Encyclopedia,". Ayon sa kanya, 75% ng
kanyang kaalaman ay mula sa self-study. Paano iyon?
Sa pamamagitan ng panonood, pakikinig, pakikiramdam
at pagbabasa. Kaya nasaan na siya ngayon? Heto at
nasa bisig ng kasikatan at kaunlaran ng buhay.
Kung ganon, pwede pala akong maging Ernie Baron.
Kahit ikaw, siya o tayong lahat ay maaari.
Talagang napakahalaga pala ang pagbabasa. Pusta ako,
kahit si Einstein o si Brad Pitt, kilala si Alice in
Wonderland. Wala sigurong magtatagumpay na artista,
negosyante, manager o maging Presidente ang hindi
nakakakilala kina Shakespeare, Chaucer o Antoine De
Saint Exupery. Hindi nila makakamit ang kanilang
kaunlaran ngayon nang hindi nagdaraan sa bahay ng
Wicked Witch, nang hindi nilalakbay ang Neverland o
nang hindi nakahahalubilo sina C.S. Lewis, Charles
Dickens, Mark Twain at Louisa May Alcott. Kilala rin
kaya nila sina Irving Wallace at Irving Washington?
Marahil.
Inasawa kaya nila ang mga aklat?
Naku, hindi lang pala napakahalaga ng pagbabasa.
Kailangang-kailangan din pala ito sa buhay.
Nakakahiya, kapag tinatanong ka ng isang Nursery o
Kindergaten pupil kung kilala mo si Ugly Duckling ay
sumagot ka ng hindi. Pangarap mo pa namang maging
Engineer, Scientist o Presidente.
Medyo nakakatakot dahil kapag hindi mo binuklat ang
aklat at pag-aralan ang mga nouns, verbs, at
conjunctions o di kaya'y ang Force, Mass at Gravity
o ang KKK, Rebolusyon at Ekonomiks ay tunaw ang
pangarap mong House and Lot with matching Ford
Expedition. Mas lalong nakakatakot dahil maaaring
ang isa sa inaasar mong "Nerd", "Adik" sa pagbabasa
o "Boy Libro" ang maging susunod na Edison, Ernie
Baron o Gloria Macapagal-Arroyo!
Nakakatakot din kapag isa sa kanila ang maging
manager sa opisinang pinagtratrabahuhan mo. Kaya
buklatin mo na iyang Webster's Dictionary sa kabinet
nyo, dahil ako, hindi magpapahuli o magpapatalo.
Ano kaya ang magiging hinaharap ko? O ng ating
bayan? Tiyak, kapag tinanong mo'y eksperto, isasagot
nito'y tanungin mo ang libro. Kausapin mo ang aklat
at ika'y paglilingkurang tapat. Tama, kapag ang
bawat Pilipino'y may hawak-hawak at binabasang
aklat, baka mas moderno at angat tayo kaysa Japan o
Amerika, walang namamalaboy at lahat tayo'y Ernie
Baron. Marahil, ito ang dahilan sa likod ng NBDB,
National Bookstore o ng komersyal sa Telebisyon na
"Read More, Be More.”
Nakakamangha ano? Kaya ako, nais ko na ring
sabihing,"Gusto kong mag-asawa ng aklat!"
<<<
F R E E-
<< Click to
subscribe to Living, Retiring, Traveling, Doing Business and
Moving To The Philippines
FREE INFORMATION FROM
EXPATS, FOREIGNERS WHO TALK ABOUT LIVING IN THE PHILIPPINES,
RELOCATION HERE AND DOING BUSINESS, TRAVELING OR RETIRING IN THE
PHILIPPINES.
